مه‌راسیمه‌كه كه به ئاماده‌بوونی خانه‌واده و كه‌س و كاری شه‌هید حسێن مه‌نسور و سه‌ڵاح كوێخا سه‌رپه‌رشتیاری ئیداره‌ی گه‌رمیان و مه‌حمود سه‌نگاوی ئه‌ندامی مه‌كته‌بی ساسی یه‌كێتی نیشتمانی كوردستان و عه‌دنان حه‌مه مینا ئه‌ندامی سه‌ركردایه‌تی یه‌كێتی نیشتمانی كوردستان و محه‌مه‌د عه‌بدوڵا جێگری سه‌رپه‌رشتیاری مه‌ڵبه‌ندی 11ی رێكخستنی گه‌رمیان و قایمقامی قه‌زای كه‌لار و به‌رپرسانی حكومی و حزبی و هاوسنه‌گه‌ران و هاورێیانی شه‌هید حسێن مه‌نسور له شاری كه‌لار به‌رێوه‌چوو.
له سه‌ره‌تای مه‌راسیمه‌كه‌دا محمود سه‌نگاوی ئه‌ندامی مه‌كته‌بی سیاسی یه‌كێتی نیشتمانی كوردستان وته‌یه‌كی پێشكه‌ش كرد رایگه‌یاند: له دوای شه‌هید بوونی فه‌رمانده "حسێن مه‌نسور" له زۆرێك له ناوچه‌كانی سنوری ئیداره‌ی گه‌رمیان وێنه و په‌یكه‌ری حسێن مه‌نسور له شوێنه گشتیه‌كاندا داده‌نرێت و له تۆره كۆمه‌ڵاتیه‌كاندا ده‌یان نازناوی ئازایه‌تی پێده‌به‌خشین، ئه‌مه نیشانه‌ی وه‌فاداری خه‌ڵكی ناوچه‌كه‌یه بۆ كه‌ڵه پیاوێكی قاره‌مان و تێكۆشه‌ر وه‌ك ليوا "حسێن مه‌نسور" كه گیانی خۆی كرده قوربانی له پێناو ئازادی و سه‌رفرازی نیشتمانه‌كه‌یدا.
هه‌ر له وته‌كه‌یدا مه‌حمود سه‌نگاوی تیشكی خسته‌ر سه‌ر هێرشه‌كانی ئه‌م دوایه‌ی هێزه‌كانی پێشمه‌رگه‌ى كوردستان بۆ دورخستنه‌وه‌ی تیرۆرستانی داعش له شاری كه‌ركوك و رایگه‌یاند:له ئێستادا هێزه‌كانی پێشمه‌رگه بۆ هه‌ر شوێنك ببات تیرۆرستان داعش له‌و ناوچه‌یه هه‌ڵدێن و له ئاینده‌یه‌كی نزیكیشدا پێشمه‌رگه قاره‌مانه‌كان به ته‌واوی كۆنترۆڵی ناوچه‌كانی ده‌وربه‌ری كه‌ركوك ده‌كه‌ن و مه‌ترسیه‌كان له‌سه‌ر ئه‌م شاره كوردستانیه نامێنیێت.
دواتر و هه‌ر له مه‌راسیمه‌كه‌دا له‌لایه‌ن عه‌لی په‌رله‌مان په‌خشانێك له‌سه‌ر ئازایه‌تی حسێن مه‌نسور خوێنرایه‌وه، پاشانیش له‌لایه‌ن چنار محه‌مه‌د خێزانی شه‌هید حسێن مه‌نسور و هه‌ر سێ منداڵه چاوگه‌شه‌كه‌ی چنار و كه‌رار و حه‌یده‌ر و مه‌حمود سه‌نگاوی ئه‌ندامی مه‌كته‌بی سیاسی یه‌كێتی په‌رده له‌سه‌ر په‌یكه‌ری شه‌هید حسێن مه‌نسور له راسته شه‌قامی شه‌هید حه‌مه ره‌ش له فلكه‌ی قه‌ڵای شێروانه لادرا.
په‌یكه‌ری شه‌هید حسێن مه‌نسور له‌لایه‌ن حه‌یده‌ر زه‌ندی و كۆمه‌لێك گه‌نجی خۆبه‌شی سنوری ئیداره‌ی گه‌رمیانه‌وه دروستكراوه.
